PASTORAL VISIT AT IGANG PARISH, POTOTAN
ABP LAZO NAGPADULONG SA BRGY. IGANG, POTOTAN, ILOILO PARA SA IYA PASTORAL VISIT
Pototan Iloilo- Mainit nga gin-abiabi si Archbishop Jose Romeo O. Lazo DD sa iya pag-abot sa Brgy. Igang Pototan, Iloilo para sa iya nagapadayon nga Pastoral Visit sang tinalikdan nga Sabado, Abril 17, 2021 tubtob Abril 18, 2021.
Sa ila pag-abot sa Our Lady of the Most Holy Rosary Parish, ginpatigayon sang parish community ang isa ka simple nga reception rite sa grupo nanday Abp Lazo. Sa nahauna nga adlaw sang iya pastoral Visit, nakighinun-anon si Abp Lazo sa mga miyembro kag lideres sang nagkalain-lain nga mga Konsilyo kag Organisasyon lakip na diri ang Tri-council. (PPC, PAC kag PFC ).
Previous
Next
Kasunod sini nagpadulong man siya Jamabalod para sa isa ka Barrio Visit kon sa diin ginhiwat ang “Dialogue with the Local Community” agod iya mahibaluan ang mga pastoral nga kinahanglanon sang mga pumuluyo didto.
Naghiwat si Abp Lazo sang isa ka Santos nga Misa upod si Fr. Virgilio Permosil, kura paroko kag pagkatapos sini, ang mga miyembro sang Youth Ministry nanguna sa pagpangamuyo sang Santos nga Rosaryo.
Ang ikaduha nga adlaw sang Pastoral Visit ginbuksan sang isa ka Santos nga Misa. Pagkatapos sang Misa, ang Parokya naghanda sang isa ka pamahaw kag ginsundan sang isa na naman ka hinun-anon kaupod ang Tri-Council kag ang mga lideres sang LOMAs kag MAMOs.
Ang Pastoral Visit sang aton Mahal nga Arsobispo, isa sa mga programa sang aton Arkideosesis sa sining tuig sang Misyon kag sa pagselebrar man sang ika-500 ka tuig nga anibersaryo sang Kristiyanismo sa Pilipinas. Ini isa sa mga misyon sang aton Arsobispo bilang manugbantay nga gintalana sang Dios nga magtatap sa panong nga gintugyan sa iya.
Magapadayon ang ini nga hilikuton sang Arsobispo tubtob nga ang tanan nga Vicariato kag Parokya sa idalom sa iya pagdumala mahimo nga mabisita kag mabuligan ilabi na gid ila Pastoral nga mga Kinahanlan.
